選舉用个台灣俗語_綠翠園老工仔思維forum.xmart.tw/formosa/

	§網綠翠園站§ 　老工仔思維

選舉用个台灣俗語

發表：老工仔	2016-01-15 16:29:27	閱覽數：3174	(IP:　)	T 4985_R 0	引　用

選舉用个台灣俗語
　　柯博喙快一句那伾去死死咧，洗臉礙到鼻，惹得「好」官人老大不爽，揚言提告，大人啊！冤枉！彼句話確實無䆀意，官司好打，狗屎好吃，即使自認法院仍然是ゴミ黨開的，但是未犯官欺，敢未犯眾議？話𤆬話大家袂計較，逐工于人指指揬揬，于人嗤母嗤呲，安呢敢个堪著？

　　在戒嚴時代，每到了選舉，黨外人士就用台灣話演講，台腳聽眾毋是人山人海，就是徛甲插插插，聽甲茫茫茫；解嚴了後，連中國ゴミ黨的候選人，包括宋楚瑜等所謂「外省郎」，為著選票，嘛用2266的台灣話咧演講，伊講捏死呆丸郎，瓦罵死呆丸郎，藍挵死呆丸郎。呆丸郎一時聽嘎喙子開開，耳子磕磕，老仙个李登輝講伊捾籃子假燒金，「乞食背葫蘆─假仙」，「瘟痀个放屁─彎彎曲曲，」「吃碗內，說碗外」、「桌頂食飯，桌腳放屎。」顛倒咱「怣百姓，」「七月半鴨仔─毋知死活」，「人鬥陣的攏是關公劉備，咱鬥陣的是林投竹刺，」咱「飼老鼠，煞咧咬布袋。」

　　選舉期間，儂儕話就儕，三色儂講五色話，逐句話三角六尖，角角傷人，「爭議兩兄弟」，「歹瓜厚子，歹人厚言語」，「六月蚶，開嘴臭，」「夭壽人講夭壽話，」「白白布，共人染甲黑，」真真是雷公子點心。

　　50年代初期，嘉義改做縣，縣長卜選頭一番，林金生甲李茂松二仙相對插，仙拚仙，拚死猴濟天，ゴミ黨選輸起瘕痀，煞搳聲卜掠人，「人掠厝拆，雞仔鳥仔挲甲無半隻」，害茂松仙起走路。50年代末，我來台北食頭路兼讀冊，佇好增額立委咧補選，郭國基，人稱郭大砲，大罵ゴミ黨，「乞食趕廟公，」「賊較惡過主人」，信介仙批評司法黑暗，有錢判生無錢判死，大肝小腱，無官不貪，「開公錢，解私願」，卡忷過馬來啊，衙門八字開，有錢使鬼會挨磨，有理無錢莫進來。

　　笑台灣人，放尿攪沙袂作伙，「割手肚肉乎于食，人猶佮嫌臭臊，」「目睭毛，無漿泔」，「角蜂，看做筍龜，」虎沒展威看作病貓，山東響當做上海嫖客，講馬英九朝直佮緣投，擔屎袂偷啉，惦惦吃三碗公半，兩任未透，龜腳總趖出來。一工遘暗恐嚇，不聽話阿共會甲咱扑，「講的歸畚箕，做的無一湯匙，」「白賊白訣講古─騙戇人，」攏是「便所內彈琴─臭彈，」死豬鎮砧，漚梨子假蘋果，「菅蓁，勿會做得拐仔」、「屎礐子板，勿會做得神主牌，」「飲水思源頭，食果子拜樹頭，食米飯拜鋤頭，」「人無害虎心，虎有傷人意，」欺負「台灣牛駛戆力好駛，」ゴミ黨內所謂本土派，掊屎抹面毋知臭，古意佮玍神，糟蹋公道伯，原本三好醫公道，豬仔輪好心加乎于伊一公道，這聲就死好。

　　「三年一閏，好䆀照輪」、「廳頭交椅輪流坐，」「有食星光，有時月光，」「花無百紅，人無千日好，」即今ゴミ黨狼狽遘手，選舉偆三票；騙票、作票、買票，
講騙票，慣習抹黑、恐嚇，「死蛇諍成活胡鰡，」50年前狗屎乾，也佮提出來挵，「屎桶，那撈那臭。」講作票，阿英呼籲大家手機摕咧，有的照光，有的錄影，牛鼻毋通犯著賊手。講遘買票，天就烏一爿，「貪伊一斗米，失卻半年糧」，這款年閣買票比賣票還怣，你敢買我加減收，敢吃伾惊漏屎。

　　這擺選舉，火燒大茨，有趣味，ゴミ黨總統找無候選人，你溜我閃，「無二步七仔，毋敢過虎尾溪，」檢啊檢，檢一個賣龍眼，司公毋卡爻和尚，豬仔輪仝款落漆，宋さん老郎吃麻油，鬥鬧熱，三不五時溜一溜，卡袂臭酸，阿英頂百人笑她空心菜，這時身辰12月刈菜正著時，實心佮有重，人氣沯沯滾。另外趣味一項，就是政黨卡儕過貓毛，大的、小的、中古的、新舊將進念外黨，乞食相爭巷子頭，「一爿是溝，一爿是圳」莫怪吳導䆀作人，家己種一欉卡好看別儂，阿英有咧喊咻，國會要改革，立委要過半，選票伾通散。

　　「唐山過台灣，心肝結歸丸，」「台灣人韭菜命，」「眾人食，眾人騎，無人疼，」日本狗子東歸，半山子摕路返鄉里，軍警調煌勢勢，三腳貓鬥一目狗，公報私仇，奪日產吃公款，國庫通黨庫，黨庫通內褲，一時風雲變色，「有毛吃到棕蓑，無毛吃到秤錘。二腳吃到樓梯，四腳吃到桌櫃」，「石獅食到瀾肚。」三七五減租，公地放領，稻穀換肥料，人民做有吃冇乾焦憖，臭蕃簽漚鹹魚渡羹頓，去「一個泄尿的換來一個滲屎的」，「草地鑼鼓一冬一冬慘，」好得佳哉！天公疼戆人，年關難過年年過，日子難過日日過，好漢囥扑，儕囝不認散「人在做，天在看」，台灣郎「共穿一領褲，」「尻川勁相偎，」有一工你會老，「少年放尿渲過溪，老人放尿滴著鞋，」才知誰是卜當家作主。

ゴミ：垃圾