| §網 綠翠園 站§ 老公仔部落格 |
|---|
| 總 覽 | 版 務 | 政 經 | 健康醫療 | 軍 武 | 理 財 | 文 化 | 藝 文 | 科 技 | 台灣的美 | 旅 遊 | PISA | 娛 樂 | 鄉 土 | 公 民 | 認 同 | 副 刊 | 哈 啦 | 范氏網 |
| 竹縫 視界 | 耳聾 世界 | 泰伯 觀點 | Joy 隨筆 | 哈利 天地 | Jerry C 鳥 世 界 | 射水魚 天 空 | 討海人 鏡 頭 | 嘻笑 人間 | 詩情 畫藝 | 老工仔 思 維 | 網網 相連 | 歷史 庫存 |
| 主題：自馬英九執政以來漚落莫濟，陋渣佮生鉎 |
|---|
| 發表：老公仔 | 2013-06-29 16:19:57 | 閱覽數：2820 | (IP: ) | T 4017_R 0 | 引 用 |
|---|
|
自馬英九執政以來漚落莫濟，陋渣佮生鉎 李老君看誕秤花，櫸「馬跤」，映望伊作新ㄟ台灣人，那知豬崽飼大隻不認豬哥作老爸，豬哥佫險險掠去牛墟，豬哥掣一趒，流規身軀凊汗。 八年市長，建設無半項，留一堆屎尾擦未離。台灣郎把喫苦當作喫補，耐操佫昧悿昧僐昧懨嘛昧搳冤屈，八年市長苦毋遘，即揣八年總統苦來兜，苦齣笑詼攏總來，想卜靠歕雞胿治國，那知肨風水雞刣無肉，好頭好面臭尻川，菅榛袂做得柺仔，毋別路也卜搶頭旗，有人說他鏡中找人，死田螺浮做伙。龍交龍鳳交鳳，隱痀交侗戇，這條哭調仔卜唱到底時? 頂擺「愛閣花」把台灣儂揌一下險暈去，即擺無講無呾雄雄捒出貿服協定，佫再甲台灣儂蹔一下骹瘸手垂、骨折肉裂，倒在塗跤兜疲疲挫。開放美髮業，黃妃妹仔有意見，開放運輸業，運匠阿三仔幹譙駛伊娘，開放殯葬業扛棺材煞卯哭，阿兄仔找孝女白琴卜上街頭，開放餐飲業，阿公店豔紅招佇壁仔阿春去抗議，這聲僫得扭轆了。 白白米飼到倲戇雞，看伊捙龜弄甕，真像胡蠅舞屎篦，講一糞箕做無一湯匙，拂甲噼啪喘，無眠兼踅神，荏懶到若一尾蟲，莫怪開會定咧盹痀。沒那種尻川，也敢吃那種瀉藥，屎緊定拄著褲帶拍死結，不時即搳拍火，敢是有儂牽牛去踏破伊兜黃金甕ㄚ蓋，也毋偌受這種蹧蹋佮創治。 這隻卵毛狗仔袒橫行，為非糝做無臭無滫，罵毋驚扑昧痛，敢且在野攏無伊法? 眾人嘛接載覅牢，有聽嗆聲卜罷免，蘇董講伊也卜蹽落去，不而過有看得喙濫水，毋看得襒褲腳。講起來台灣儂真覅攝，老癥頭醫昧好，這諞仙舞即齣，通講無儂敢出頭? 咱飲冷酒，吃凊飯，看暝尾戲等伊。 |
| 總 覽 | 版 務 | 政 經 | 健康醫療 | 軍 武 | 理 財 | 文 化 | 藝 文 | 科 技 | 台灣的美 | 旅 遊 | PISA | 娛 樂 | 鄉 土 | 公 民 | 認 同 | 副 刊 | 哈 啦 | 范氏網 |
| 竹縫 視界 | 耳聾 世界 | 泰伯 觀點 | Joy 隨筆 | 哈利 天地 | Jerry C 鳥 世 界 | 射水魚 天 空 | 討海人 鏡 頭 | 嘻笑 人間 | 詩情 畫藝 | 老工仔 思 維 | 網網 相連 | 歷史 庫存 |