| §網 綠翠園 站§ Joy部落格 |
|---|
| 總 覽 | 版 務 | 政 經 | 健康醫療 | 軍 武 | 理 財 | 文 化 | 藝 文 | 科 技 | 台灣的美 | 旅 遊 | PISA | 娛 樂 | 鄉 土 | 公 民 | 認 同 | 副 刊 | 哈 啦 | 范氏網 |
| 竹縫 視界 | 耳聾 世界 | 泰伯 觀點 | Joy 隨筆 | 哈利 天地 | Jerry C 鳥 世 界 | 射水魚 天 空 | 討海人 鏡 頭 | 嘻笑 人間 | 詩情 畫藝 | 老工仔 思 維 | 網網 相連 | 歷史 庫存 |
| 主題：心適的一工 |
|---|
| 發表：Joy | 2021-01-02 18:43:28 | 閱覽數：3492 | (IP: ) | T 7411_R 0 | 引 用 |
|---|
|
彼日，阿微愛去榮總照超音波，所致伊昨暗過子時就無食物件矣。下早仔宏仔也有較早起來，毋過，狗仔代、貓仔代凊彩款款咧嘛是拖到八點外，位恆春一路開車到榮總已經欲倚十一點矣，拄拄好趕會著報到，按呢阿微知影伊又閣排佇上後尾一位，上緊嘛愛等到12點左右才會輪到伊。 阿微想講佮遮爾濟人作伙佇遮等，不如落去樓跤踅踅咧，無定著會看著啥物好康嘛無一定。伊那想那行，一个專櫃行過一个，雄雄聽著：「小姐，來佮阮交關一下啦~」伊就停落來佇一攤咧賣健康食品的專櫃頭前，才欲開喙問價數的時，對方就提一盤試食品叫伊先試食看覓咧，阿微敢若有小可仔張持的款。 專櫃小姐就鼓舞講：「來啦~免細膩，遮攏是有機ê喔~」 「有機ê喔~好！試食看覓咧！」一聽著有機ê，阿微目睭就金起來。有一就有二，加上專櫃小姐的鼓舞，逐種口味攏試食，順紲問東問西，有講有笑，想講等宏仔來接伊的時陣才過來買寡仔轉去。講到遐，才發覺著欲12點矣，才想著伊小等ê愛照超音波呢。 阿微心內咧想：「這聲害了了矣！欲按怎共醫生講較好？無講嘛袂使得，嘛是愛拜託醫生重開單。」伊搭電梯到二樓的時陣，有聽著護士小姐咧叫伊的名。伊就缀護士小姐行到病床才開喙講：「我今仔日袂使照超音波矣，欲請蔡醫師重開單予我。」 「妳是按怎袂使照超音波？」 「我頭拄仔佇一樓咧踅的時陣，人咧鼓舞我試食有機的健康食品，我一興頭就袂記持今仔日愛照超音波的代誌，就一塊試食過一塊囉。」 話才講煞，護士小姐覕喙欲笑毋笑：「無要緊，妳先倒咧，我來去叫醫生。」 一觸久仔，醫生就入來，唸著阿微的名閣問講：「妳位恆春來的齁？妳食佗一个專櫃的試食品？好呷無？」 「蔡醫師，真失禮啦~我毋是刁故意的矣！」 「無要緊，來！倒互好，深呼吸、閉氣，好！放鬆。。。」 |
| 總 覽 | 版 務 | 政 經 | 健康醫療 | 軍 武 | 理 財 | 文 化 | 藝 文 | 科 技 | 台灣的美 | 旅 遊 | PISA | 娛 樂 | 鄉 土 | 公 民 | 認 同 | 副 刊 | 哈 啦 | 范氏網 |
| 竹縫 視界 | 耳聾 世界 | 泰伯 觀點 | Joy 隨筆 | 哈利 天地 | Jerry C 鳥 世 界 | 射水魚 天 空 | 討海人 鏡 頭 | 嘻笑 人間 | 詩情 畫藝 | 老工仔 思 維 | 網網 相連 | 歷史 庫存 |