敢作匏桸就不怕滾水燙_綠翠園文化分區forum.xmart.tw/formosa/

	§網綠翠園站§ 　　文化分區

敢作匏桸就不怕滾水燙

發表：老工仔	2016-08-28 05:53:48	閱覽數：2561	(IP: 　)	T 5371_R 0	引　用

敢作匏桸就不怕滾水燙
　　選總統大家有機會，四年一勻好壞著分，有人氣摕去座，專制時代，譏諷台灣人放尿攪沙袂做堆，精的出嘴憨的出手，乎人軟土深掘，像桌頂食飯桌腳放屎尿，彼時辰上天無路，落地無步，袂尬著迫虎就會傷人，細孔毋補，大孔叫艱苦，咱卜選總統，咱卜出頭天，艱苦頭總算有快活尾。

　　少年若無一遍憨，路邊那來有應公，歹竹有時也會出好筍，好竹嘛也出痀崙，人矮只是腳較短志氣才來拼高低，山頂無好叫，山腳無好應，做牛著拖，做人著磨，互相漏氣求進步，仙拼仙害死猴齊天，少年拼出名，食老惜名聲，你看我殕殕，我看你霧霧，人生親像大舞台苦齣笑魁攏公開，天公疼憨人，大隻雞慢啼，嫌戲無請，請戲無嫌，既來之則安之，也著神，也著人，「達家」稍安莫燥。

　　明知這灘坔田準路歹走踏，手提破網心沉重，不過徛著勢卡好捌拳頭，為著趕工卡艱苦嘛要行，卜殺豬著捌刀路，做猴著會爬樹，火燒菇寮雖然全無望，明知擔沙填海撂憨工，船破海座底，凊飯伓吃諸嫺个，醫生驚治咳，總舖師驚吃晝，土水師驚掠漏，好琵琶總袂適吊於壁，活活馬袂綁於死樹頭，無三兩三，不敢上梁山，沒有兩步七仔，毋敢過西螺溪，千里路途三五步，百萬軍兵六七人，真茶無色，真人無激，鈍刀著要使利手，袂通掟著怕捏死，放著怕飛去，欸！歡喜做嘛愛甘願受。

　　中國國民黨，乞食趕廟公，一盤魚脯全全頭，嚴官府出厚賊，嚴父母出阿里不達，九頓米糕無准算，一頓凊糜抾起來囥，蔡抵蔡公媽龕挵挵破，一心傾中，豬頭袂顧顧鴨母卵，偷捏偷捻一世人欠，千算萬算，毋值天一劃。土猴損五榖，一指遮目，無看見大山，有看到針鼻沒看到拱城門，鳥仔腳蜘蛛肚，一暝專頭路天光無半步，淡水魚無法入鹹水港，家己無肉，竟然怨人大尻川。

　　敢吃敢脹，毋驚人譬相，嘴吃嘴嫌，臭酸食到生黏，好額儂乞食性命，有賺虎吞，無賺虎睏，有錢三頓，無錢當衫，賤價拋售黨產，驚跋落屎窖，毋驚火燒厝，缺嘴食米粉看現現。小生苦旦免相瞞，腳花先踏出來看，會偷吃不曉擦嘴，面頂燒滾滾，下腳澇涼粉，有錢烏胿坐大廳，無錢秀才人人驚，未仙假仙，牛卵假鹿鞭，圓人會扁，扁人會圓，萬般都是命，半點不由人。

　　國民黨歹船佇著好港路，豆油分伊搵連碟仔煞捧去。食蛇肉配虎酒，有毛的吃到棕簑，無毛的吃到秤錘，食肥走瘦，也曉食袂曉行路，相推駛死牛，好好鱟刣甲屎那流，無彼個尻川，也敢吃彼個瀉藥，卜好像龜爬壁卜敗像水崩山，寵豬舉灶，寵子不孝，寵某吵鬧，寵後生囝，半夜爬起來哭號，寵諸姥囡歹入儂家教。

　　媠醜在肢骨，不在梳妝三四齣，眉先生，鬚後生，先生不及後生長，行行出狀元，類類有高低，滿山樹木，毋是師傅取無樑，有人未肥先喘，昧曉挨絃，顧絞線；昧曉唱曲，顧噴涎，有人甘願予賢人做奴才，毋愛替頇顢皇帝做軍師，做生無生才，做三花無詼諧，攑旗軍驚人刣，做乞食袂曉背筊織，做小旦袂曉點胭脂，毋怕人毋倩，只驚藝不精。

戲棚上的皇帝作毋久，牛瘦冇力、人散白賊歹瓜厚子，歹人厚言語，馬英九
袂曉泅嫌卵孵大球，千億黨產七洋八洋洋了了，鴨稠無隔暝杜蚓，人交陪是關公劉備伊交陪是林投竹刺，冬至未到先搓圓，偷吃未曉擦嘴，儕蝨袂癢儕債袂想，如今一卸任，啥乜漚糟垃圾步儘展無遺，光幫他屁股就忙得人仰馬翻，他倒樂得秋凊說風涼話，揶揄新政府，做總統毋是人人也暁，咱們做甲汗流閃滴，伊儂嫌到鼻流涎滴，嘴舌無骨反入反出，歡喜就好。